كتبت اريج
سامحيني يا امي.. و لا بقى تنطريني
بكرا عيدي و عيد جيشنا الغالي، بس انا بالسما و السما بعيدي..
سامحيني ما رح اركض ليكي و شمك، الارهاب ما تترك احساس فيني و لا خلاكي بأخر انفاسي تواسيني..
سامحيني لولا بيوم قصرت و تركت ارضي ع بكير تناديني و ما اسمعلها..
الجيش علمنا ندافع و نخدم الوطن بكل وفا و شرف، و لما عالتضحية طلبنا ما قصرنا..
الجرود الي رويناها بدماتنا و دمعاتك، لا تتركيها و ادعي لالله يصونها من الي باعها و باعنا..
رخص دمنا، و طوت الايام ملفاتنا، تركتوا الخيم و الساحة و نسيتنا وراق الجريدة..
لا تزعلي يا امي، بكرا الله سبحانه بياخذ حقنا متل ما اخذ حق غيرنا.
كل ما تشوفي جيش بلادي انتصر، قولي ابني الشهيد روحه عم ترفرف مع علمنا.. زوري قبري و حطي وردة من ريحتك و تأكدي فدى لبنان استشهدت مش فدى حكامنا.
ادعي لرفاقي الله ينصرهم و يظلوا قادرين يتحملوا مسؤولية الوطن وخبري الدني كلها انه جيش لبنان لا معاش ولا مساعدة و لا علبتين دخان بتوفيهم…
